नुवाकोट, नेपाल भ्रमण वर्ष २०२० मा आन्तरिक तथा बाह्य पर्यटकलाई ग्रामिण गन्तव्यको यात्रा गराउने उदेश्य सहित रसुवा नुवाकोट पर्यटन समाजले फिकुरी टेकिङ टेलको अध्ययन अवलोकन भ्रमण आयोजना गर्ने भएको छ । फागुन ११ गते नुवाकोट दरबार बाट सुरु हुने भ्रमण कार्यक्रममा पर्यटन व्यवसायी, पत्रकार तथा स्थानियहरुको सहभागिता हुने रसुवा नुवाकोट पर्यटन समाजका कार्यवाहक अध्यक्ष शिव लामिछानेले बताउनु भयो ।

फिकुरी ट्रेल सूर्यगढीबाट सुरु भई भाल्चे, किस्पाङ, फिकुरी, ठूलोगाउँ, घलेगढीमा पुगेर सम्पन्न हुने रसुवा नुवाकोट पर्यटन समाजका उर्जा तामाङले बताउनु भयो । नेपाल पर्यटन बोर्डको प्रर्वद्धन सूर्यगढी, किस्पाङ, उतरगया, कालिका गाउँपालिकाको समन्वयमा टान र एनएमएको सहयोगमा कार्यक्रम आयोजना गरिएको रसुवा टेक्सका संचालक युवा पर्यटन व्यवसायी गगन न्यौपानेले बताउनु भयो । पदयात्रा फागुन ११ गते सुरु भई १५ गते समापन हुदै छ । राजधानी नजिक भएर पनि नुवाकोट जिल्लामा पर्यटकिय गतिविधिहरु उल्लेख्य रुपमा संचालन हुन सकिरहेको छैन । पछिल्लो समय होमस्टेमा आन्तरिक पर्यटकहरु गई बस्ने गरेका छन् तथापी होमस्टेको सवै ठाउँमा उचित व्यवस्थापन हुन नसक्दा पर्यटकहरुको सहज बसोबास हुन सकिरहेको छैन । हिमाली जिल्ला रसुवामा भने पर्यटकहरुको राम्रो आवागमन हुने गरेको छ । लाङटाङ, तामाङ हेरिटेज टेल तथा गोसाईकुण्डमा स्वदेशी सँगै विदेशी पर्यटकहरुको राम्रो आवतजावत हुनेगरेकाे छ ।