सौराहामा थारु संस्कृतिक फगुवा महोत्सव सुरु

चितवन । नेपालको तेस्रो पर्यटकीय नगरी सौराहामा पहिलो पटक थारुहरुको संस्कृति प्रचार गर्ने उद्देश्यले फगुवा साँस्कृतिक महोत्सव सुरु भएको छ । महोत्सव भोलि २८ गते सम्म चल्नेछ । थारु जातिको ऐतिहासिक महत्व बोकेको महोत्वसमा थारुहरु एकै ठाउँमा भेला भई ‘समत’ प्रज्वलन गरी फगुवा महोत्सवको सुरुवात गरेका थिए ।

रत्ननगर नगरपालिकाको वडा नं. १७ सिसुवार (सौराहा)को चौरमा कार्यक्रम भएको मूल समितिका संयोजक मागर महतोले जानकारी दिए । थारु समुदायको महान चाड फगुवामा फागु पूणिर्माको बेलुका हरेक थारु गाउँमा चीर बनाएर जलाउने गरिन्छ । त्यसलाई थारु भाषामा ‘समत लेसे’ भनिन्छ । त्यसको अर्को दिन सबेरै समत पोलेको खरानी उडाउने र खरानीकै टीका लगाएर फगुवा मनाउने गन्छि । त्यस दिनलाई धुरहेरी भनिन्छ ।

समत (चीर) सम्बन्धी विभिन्न किंवदन्तीहरु छन् । हिन्दु धर्ममा यसलाई होलिका दहनको रुपमा लिइन्छ ।

थारु साँस्कृतिक नाचगीतका साथै थप मनोरञ्जनका लागि आधुनिक गायक कलाकारहरुको समेत प्रस्तुति रहने साँस्कृतिक कार्यक्रम व्यवस्थापन समितिका संयोजक दिपेश चौधरीले जानकारी दिए । महोत्सवमा लोकगायक मिलन लामा, संजय चौधरी, मनोज महतो लगायतका गायकहरुको प्रस्तुति रहनुका साथै अन्तिम समयमा डिजे गीत संगीतमा पार्टी डान्सको समेत व्यवस्था गर्ने आयोजकले जनाएको छ ।

महोत्सव अवलोकनका लागि निःशुल्क प्रवेशका साथै थारु खाना बिक्री वितरण गर्नेहरुलाई पनि निःशुल्क स्थान दिइने आयोजकले जनाएका छन् । महोत्सव, थारु साँस्कृतिक संग्राहलय र प्याराडाइज युवा क्लवले आयोजना गरेको हो । महोत्सवले थारुको पहिचान, संस्कृतिलाई थप उजागर गर्ने आयोजकहरुको विश्वास छ ।