टानको अन्तराष्ट्रिय म्याराथुन सम्पन्न, नेपालीले पनि घुम्नैपर्ने हिमाली गन्तव्य लाङटाङ

भुमराज तिवारी /पारसमणि अमगाई
स्याफ्रुबेसी, टानले भुकम्पबाट सवैभन्दा प्रभावित पर्यटकिय गन्तव्यलाई प्रचार प्रसार गर्नको लागी मंगलबार लाङटाङ म्याराथुन सम्पन्न गरेको छ । प्रतियोगितामा ३ घन्टा ३४ मिनेटमा दौड पुरा गर्दै होमलाल श्रेष्ठले उपाधि जितेका हुन् । सेनाकै राजन खत्री दोस्रो तथा बेदबहादुर सुनार तेस्रो भए ।
यसैगरी, महिलातर्फ सरिता बासीले ५ घन्टा १३ मिनेट २७ सेकन्डमा दौड पुरा गर्दै प्रथम हुन सफल भइन । दोस्रो भएकी सेनाकी रेस्यू बस्नेतले ५ घन्टा १४ मिनेट ४५ सेकेन्डमा दुरी पूरा गरिन् भने पुष्पा भण्डारीले ५ घन्टा २६ मिनेट ४७ सेकेन्डमा दुरी पार गरी तेस्रो स्थान ओगटिन् ।
‘भूकम्पबाट पूर्णक्षति पुगेको लाङटाङ गाउँमा पर्यटन प्रबद्र्धन गर्न सहयोग गरौं’ भन्ने नाराका साथ ट्रेकिङ एजेन्सिस एसोसिएसन अफ नेपाल टानले प्रतियोगिता आयोजना गरेको अध्यक्ष चन्द्रप्रसाद रिजालले बताउनु भयो । कार्यक्रम वृहत सन्देश सहित सफल भएकोमा खुसी व्यक्त गर्दै रिजालले लाङटाङमा अब पर्यटक बढ्ने विश्वास व्यक्त गर्नुभयो । नेपालीहरुमा पनि घुमफिरको संस्कृति बढ्दै गएकोले हरेक नेपालीले एकपल्ट लाङटाङलाई गन्तव्य बनाउनुपर्ने टानका महासचिव कर्ण लामाले बताउनु भयो । हामीले घुमेर सुन्दरताको मात्रै अवलोकन गर्दैनौ स्थानियहरुलाई पनि सहयोग पुग्छ लामाले भने छोटो दुरीमा हिमाली वातावरणको अनुभव गर्न पाइन्छ । नेपालीको लागी सस्तो गन्तव्य समेत रहेको लामाको भनाई थियो । ८ दिनमा पुरा गर्न सकिने लाङटाङ घुम्न १० हजार रुपैयामा घुम्न सकिन्छ ।
प्रतियोगिता लाङटाङको क्यान्जिङबाट सुरु भइ बृद्धम लिङलिङ हुँदै स्याफ्रुबेसीमा सम्पन्न भएको थियोे । विजेताले एक लाख, दोस्रो हुनेले ७५ हजार र तेस्रो हुनेले ५० हजार रुपैयाँसहित प्रमाणपत्र प्राप्त गरेका छन् । प्रतियोगितामा १० विदेशी, १४ महिलासहित १०२ जना सहभागी थिए ।